“Эс Ар Пи Инженер Консалтинг Монголиа” ХХК, “Аварга Зам” ХХК ба “Эс Ар Пи Шнайдер энд Партнер Инженер Консалт” ХХК-ийн түншлэл нь Азийн хөгжлийн банкны санхүүжилтээр Байгаль орчин, аялал жуулчлалын яамны захиалгаар хэрэгжүүлж буй “Тогтвортой аялал жуулчлалыг хөгжүүлэх төсөл”-ийн хүрээнд Хөвсгөл аймагт 37.9 км зам барилгын ажлын зөвлөх үйлчилгээг үзүүлж байна.

Тус зам нь Хөвсгөл нуурын эрэгтэй ойрхон, мөнх цэвдэгтэй, намгархаг хөрстэй, инженер геологийн хувьд төвөгшилтэй газар хийгдэж байгаа тул ТЭЗҮ-д тусгагдсаны дагуу Хатгалаас Хүзүүвчийн шил, Ашихай хүртэлх авто замд ГЕОТОРЛОГ ХЯЗГААРЛАГЧ /GEOCELL/ материалыг ашиглаж хучилтын суурийн хөрсийг тогтворжуулж, цэвдэг хөрснөөс авто замд учруулах нөлөөллийг бууруулна.

Монгол Улсад өмнө нь зам барилгын салбарт төдийлөн ашиглагдаж байгаагүй тус технологийг турших ажил эхэлж ХБНГУ-ын Эс Ар Пи Шнайдер энд Партнер Инженер Консалт ХХК-ийн мэргэжилтнүүд болон зөвлөхийн баг бүрэлдэхүүн уг технологийн талаар төсөлд хамаарагч бүх талууд буюу ЗТХЯ, БОАЖЯ, ЗТХТөв, МХЕГ, Хөвсгөл аймгийн ЗДТГ, МХГ, замын компаниуд, мөн Төсөл хэрэгжүүлэх нэгж, Гүйцэтгэгчийн төлөөллийг оролцуулан танхимын болон практик сургалтыг Хөвсгөл аймгийн Алаг-Эрдэнэ сумын Хатгал тосгонд 2022 оны 8 дугаар сарын 24-нд зохион байгууллаа.